Хүүхдийн хөлийг чанга өлгийдөх нь түнхний мултрал үүсгэх аюултай
Монголчууд хүн болох багаасаа, хүлэг болох унаганаасаа гэдэг. Энэ үгийг зүгээр ч нэг хэлээгүй, тухайн хүүхдийн хэр эрүүл чийрэг, эрдэм ухаантай хүн болох нь эрүүл ахуйн асаргаа, хүүхэд насны төлөвшлөөс ихээхэн хамаардаг гэдгийг хэлсэн хэрэг биз ээ. Тиймээс эхчүүддээ эрүүл нярайн асаргааны талаарх зөвлөмжийг хүргэж байна.
Нярайн асаргаанд хамгийн чухал нь ариун цэврийг чанд сахих явдал юм. Иймд нярайн өрөөг цэвэр, гэгээтэй, дулаан байлгах ба өдөрт дөрвөн удаа өрөөний агаарыг сольж, хоёр удаа чийгтэй цэвэрлэгээ хийнэ.
Хүүхдийг зөөлөн гудастай, жигд дэртэй, цагаан хэрэглэлээр бүрсэн оронд тусад нь унтуулвал зохино.
Хүүхдийн даавуу, өлгий, хувцсыг том хүнийхээс тусад нь хүүхдийн зориулалтын савангаар угааж, цэвэр усаар сайн зайлах шаардлагатай.
Нярайг усанд оруулахдаа тусгай зориулалтын түмпэнг угааж, ариутгаж, ёроолд нь дөрөв нугалсан өлгийн даавуу дэвсэж, хүйний шарх эдгэтэл буцалгаж, бүлээтгэсэн усанд оруулна. Нярайг эх нь гарын шуун дээр хэвтүүлж, усанд оруулбал эвтэйхэн байдаг.
Өлгийдөх: Дутуу нярайг хоёр цаг тутамд, гүйцэд нярайг гурван цаг тутамд хөхүүлэхээсээ өмнө хуурайлна. Өлгийдөхдөө хүүхдийн хөдөлгөөнийг хязгаарлахгүй, хоёр хөлийг чөлөөтэй өлгийднө. Зарим эцэг, эхчүүд хөлийг майга болохоос сэргийлж хоёр хөлийг тэнийлгэж чанга өлгийддөг. Энэ нь түнхний мултрал үүсгэх аюултай. Ер нь хүүхдийг нярай үеэс хувцаслах нь хүүхдийн хөдөлгөөн, сэтгэцийн хөгжилд сайнаар нөлөөлдөг.
Салхинд гаргах: Хүүхдийг өдөр бүр салхинд гаргана. Дулааны улиралд хүүхдийг төрөх газраас гармагц 10-15 минутаас эхлэн аажмаар хугацааг нэмж салхинд гаргана.
Хооллох: Нярай хүүхдийн гадаад орчинд дасан зохицох нэг гол нөхцөл нь хөхөөр хооллох явдал юм. Эхийн сүү нь хүүхдийн өсөлт бойжилтод шаардагдах бүхий л бодисыг агуулсан байдаг тул эрүүл нярайг төрсний дараа хоёр цагийн дотор амлуулна. Нярайг гурван цагийн зайтай хоногт 7-8 удаа хөхүүлнэ. Хоёр хөхөө ээлжлэн хөхүүлж, үлдэгдэл сүүг саах нь хөхөнд сүү ороход сайнаар нөлөөлдөг. Нэг хөх нь цатгахгүй байгаа тохиолдолд нөгөө хөхийг өгнө.
Арьс арчлалт: Нярай хүүхдийн арьс нимгэн, эмзэг, амархан гэмтдэг. Хоногтоо 15-20 удаа шээж, 2-3 удаа өтгөн ялгаруулна. Шээс, өтгөний дараа бөгсөн биеийг бүлээн усаар угааж, ариутгасан наранцэцгийн тос, хүүхдийн тос, загасны тос түрхэнэ. Эмэгтэй хүүхдийн бөгсийг угаахдаа урдаас арагш чиглэлтэй угаана.
Хүй арчлах: Нярайн хүй нь төрсний дараа 3-4 дэх хоногт цөглөдөг бол үлдсэн шарх нь 10-20 хоногийн дотор эдгэдэг. Энэ үед өнгөгүй, чийглэг шүүс бага багаар гарна. Өдөрт 1-2 удаа 96 хувийн цэвэр спирт шингээсэн ариун хөвөн бөмбөлгийг хямсаагаар хавчиж төвөөс зах руу чиглэлтэй цэвэрлээд өөр бөмбөлгөөр хуурай болтол арчсаны дараа таван хувийн марганц эсвэл 1-2 хувь бриллиантын ногооны спиртэн уусмалаар цэвэрлэнэ. Хэрэв хүйнээс шүүс ялгарахгүй, хуурай, цэвэр байвал заавал цэвэрлэх шаардлагагүй.
Нүд цэвэрлэх: Өглөө бүр нүдийг буцалсан усанд норгосон хөвөн бөмбөлгөөр гаднаас нь дотогш арчина.
Хамар цэвэрлэх: Нярайн хамрыг эрчилж, чангалсан нарийн хөвөнгөөр цэвэрлэнэ. Шингэн нустай үед хуурай эсвэл вазелинтай хөвөнгөөр, нус хатсан үед эрчилсэн хөвөнгөө содны уусмалд норгоно.
Чих цэвэрлэх: Чихний дэлбээ, сувгийг хуурай, ариутгасан хөвөнгөөр цэвэрлэнэ
Санаж яавхад илүүдэхгүй болвуу?
|
Статистик 
Администратор: 1 
Хориглосон гишүүд: 0 
